23r

Des .vij. ars, de philosophie
Ains est .i. mestiers qui salie
Acors domme de mal saner
Et de maladie garder
Tant com il se maintient en vie
Et por ce liberaus nest mie
Car ele sert dou cors garir
Quaucune fois porroit perir
Et nule riens liberaus nest
Ne franche qui de terre naist
Et por ce science qui sert
Acors humain, franchise pert
Mais celes qui alame servent
Liberaument, au monde servent
Car lame doit liberaus estre
Si comme chose de noble estre
Comme cele qui de dieu muet
Et adieu revenir se veut
Et por ce ars, liberaus sont
Que lame toute franche font
Et ensaignent com on doit faire
Proprement a chascun afaire
Iceste est la propre raison
Por quoi ars, liberaus ont non
Queles font home liberal
Et delivre estre de tout mal
De cestes est musique lune
Qui si bien sacorde achascune
Car par li concordees furent
Les .vij. ars si com eles durent

[initial: 27th row, opening initial /D/, 2 lines, in red with blue pen flourishing]