36v

En vers gemmes nen vers or fin
Que riens ne valent en la fin
Mais por ce quil vous est avis
Quele est grans sen ferons devis
Et si le vous deviserons
Briement ausi com nous sarons
Comment la terre est devisee en .iii. parties li premiers capitles
Puis quentendu aves la some
comme la terre comme pome
Est reonde de toutes pars
Dont nest pas habites li quars
Que on sache de nule gent
En un quartier tant seulement
Si com li philosophe quistrent
Qui grant painne et estude imistrent
Et por ce le deviserons
En quatre pars tout environ
Dont par une poume poes
Prendre essample se vous vo[les]
Qui parmi partie seroit
En .iiij. quartiers tout adroit
Delonc, de le, et par moities
Et un quartier empresissies
Sestendissies la peleure
Por miex entendre la faiture
Toute entiere parmi un plain
Ou enmi lieu de vostre main
Tant est de la terre habitee
Dont lune moities est clamee
Oriens, et lautre occident

[initial: 8th row, opening initial /P/, 4 lines, in red with blue pen flourishing]