42v

Et la keue dun olifant
Deus cornes dun coste de grant
Dont lune sor son dos abast
Tant com de lautre se combast
Noirs est et beste molt horrible
En aigue et en terre penible
Si sont torel qui tout blanc sont
Sont grosse teste et la bouche ont
Si largue que la fendeure
De lune oreille alautre dure
EN ynde une autre beste i a
Quon apele menticora
Vis domme et .iij. ordres dedens
Li sont en la bouche dedens
Vis de chievre, cors de lion
Et la keue descorpion
Vois de sarpent, qui par chant gent
Atrait et deveure la gent
Et est plus isnele daler
Que nest uns oisiaus de voler
Bues i ra qui pies reont ont
Et .iij. cornes emmi le front
Une beste i a de bel cors
Com apele monatheros
Cors de cheval pie dolifant
Teste de cerf, vois clere et grant
Keue tele com truies ont
Et une corne emmi le front
Qui de longour a .iiij. pies
Droite et ague com espies

[initial: 11th row, opening initial /E/, 2 lines, in blue with red pen flourishing]

[initial: 21st row, opening initial /B/, 2 lines, in red with blue pen flourishing]