44v

Por sentir cele grant doucor
Fors li sarpens, cui bonne oudor
Grieve, si quil emmuert souvent
Cele beste na seulement
Cune fois faons, et quant doit
Faouner, sia tel destroit
Quas ongles ront son ventre lors
Tant que li faons en soit hors
Mais jamAis faons puis navra
Quant ensi son ventre rout a
Une maniere de Jument
I a, qui concoivent dou vent
En capadoche une contree
Mais nest que .iij. ans lor duree
Cele part sont li oliphant
Grans bestes, et fort combatant
Qui sanc lor moustre devant eus
Sen sont plus fort et corageus
Par tous lieus sose bien embatre
Sor als se soloient combatre
Cil dynde, et de perse souvent
Car molt bien porte une tour grant
Qui est plainne de gent armee
Quant desor son dos est fermee
Un bouel ont, par de devant
Dont il menjuent, large et grant
Dont prent bien .i. homme et deveure
Et si lenglout en petit deure
Les gens alixandre qui fu
Rois et bons clers de grant vertu

[initial: 11th row, opening initial /U/, 2 lines, in blue with red pen flourishing]