50r

Dont vous oi aves asses
Dayse la menour
Apres vient ayse la menor
Qui close est demer tot entor
Ou il a maintes regions
Dont pas ne dirons tous les nons
En ceste siet, frise, et ardenne
La ou paris, ravi helainne
Dont troies la grans fu destruite
Quen la fin de grece est construite
Cele part est, lychaonie
Et une autre, qua non tharye
Ou hermes keurt vas flueves grans
Dont la gravele, est trop luisans
De cele part, devers la fin
Nous vient la paillole dor fin
Dautre part devers orient
Sont une maniere de gent
Qui descendirent de juis
Et sont unes gens orde et viels
Ne femme espousee, nont mie
Por ce que il ne croient mie
Que femme se puisse tenir
A un seul homme, sans faillir
Nont cure de femme, fors tant
Quil puissent engenrer enfant
Autre gent i a, barbarins
Qui se font clamer jacobins
Por jacob qui lor maistres fu
Et sont crestien, corrumpu

[initial: 3rd row, opening initial /A/, 2 lines, in red with blue pen flourishing]