50v

Por les mariaiges quil font
As sarrazins qui pres dals sont
Et porprennent bien cele gent
.xl. regnes de tous seus
Ne croient pas confession
De nul autre home sadieu non
Quant il se confessent a dieu
Pres dals metent encens et feu
Et cuident quen cele fumee
Sen aille vers dieu lor pensee
Nest pas ensi com il le croient
Saint jehan baptiste mescroient
Qui les baptisa premerains
Car dire lor convient au mains
Tous les pechies a lui meesme
Et puis recevoient baptesme
Dont Sains jehans meismes dist
Que quant li hom ses pechies dist
A un autre cele vergoigne
Quil a dou dire sa besoigne
Li est tornee a penitance
Et de ses pechies alegance
Et puis de pechier se retient
Quant il set que savoir convient
A un autre tout son afaire
Ains que vers dieu se puisse traire
Ce dist sains jehans li baptistes
Qui par baptesme nos rent quites
En vers dieu de tous nos pechies
De confession espurgies