58r

Et li autres la sieut tous las
Li chiens les biens son signor garde
Domme et de beste bien le garde
Si le connoist, et son signor
Aimme de si parfaite amor
Que sovent avient qua la mort
Nel veut guerpir, na droit na tort
Et de sa mort tant se daura
Que de duel sovent en morra
En aucuns lieus en engleterre
A tels qui les larrons vont querre
Qui lor signor ont riens emble
Et quierent tant quil ont trove
La moustoile quest molt petite
Quiert et ocist, le basilisque
Et se combat tant au serpent
Quele locist outreement
Ses faons si sovent tresmuet
Qua painnes nus trover les puet
Lirecons les pumes abat
Pardesus se roule, et embat
Les poumes en ses aguillons
Sen vait si carchies com uns trons
Chantant, et menant son deduit
Quant bien se sent carchie de fruit
Quant mal li vient faire autre beste
Si met ensamble, pies et teste
Et se tient en un reondel
Les aguillons dehors sa pel
Que beste ne si ose embatre