58v

Por assaillir ne por combatre
Li aignials qui onques ne vit
Le leu, le doute, et le guenchist
Et autres bestes riens ne doute
Ains se met entresles et boute
De la maniere de nos oisials
LI aigles par les ongles prent
Ses poucins et les tient forment
Celui qui fermement se tient
Si lainme, et o lui le retient
Celui qui ne tient fermement
Laisse aler que garde nen preent
Quant vieille est si vole si haut
Que les nues passe et achaut
Ou solail tient tant sa veue
Que toute la, arse et perdue
Et ses pennes bruslees sont
Lors chiet aval tout en un mont
En une aigue, quele a choisie
Ensi renouvele sa vie
Son bech, depiece a une pierre
Puis li vient autres bes arriere
Quant la torteruele a perdu
Son masle quele a conneu
Ja puis autre masle naura
Ne sor vert arbre ne serra
Ains sen va par les arbres ses
Ausi com gemissant ades
Lostrice fer, menjue bien
Ne ja ne li grevera rien

[initial: 7th row, opening initial /L/, 4 lines, in red with blue pen flourishing]