59v

Plus volentiers quaillors demore
Qui de son sanc sen oindroit ore
Et alast dormir maintenant
Il li sambleroit en dormant
Quanemi devant lui venissent
Qui tuit estrangler le vausissent
Li lorsignos muert en chantant
Et la loette bien souvent
Li cignes est blans par defors
Et dedens noirs par tot le cors
Contre sa mort chAnte souvent
Ensi avient de mainte gent
De tels choses et demolt dautres
Ses merveilleroient gens autres
Qui riens nen avroient oi
Plus que nous ne feriens ci
Car souvent en veons aucunes
Si sont autres choses communes
Dont chascuns merveillier se puet
Qui as merveilles, penser veut
Des vertus daucunes choses communes li .vii. capitles
Molt de choses samblent apertes
dont les raisons sont molt couvertes
Et por ce merveillent, la gent
De ce que nes voient souvent
Vis argens est de tel maniere
Que sor lui soustient fais de piere
Quaigue ou oile pas ne feroit
Car la piere au fons en iroit
Laigue froide, au chaut mellee

[initial: 22nd row, opening initial /M/, 2 lines, in blue with red pen flourishing]