66v

En cavernes qui sont sous terre
Et li airs, qui dedens se serre
Qui est enclos a grant destroit
Se terre est foible la endroit
Quele nel puisse retenir
Cel air qui ses force dissir
Si dessoivre la terre et fent
Dont il est avenu sovent
Que viles, et cites meismes
En sont fondues en abysmes
Et se la terre est de tel force
Quele ne fent ne crosle aforce
Par le deboutement des vens
Qui adestroit sont la dedens
Si sesmuet si durement lors
Que li grant mur, et les tours fors
Qui sieent la endroit desus
Si soudaninement chieent jus
Que la gent assomme, et confont
Qui pas porveu ne se sont
Mais chascuns enson lieu demeure
Quil ne sevent pas a quele eure
Cele tempeste doit venir
Li sage qui cuident morir
Saparaillent com ala mort
De querre envers dieu lor racort
De lor pechies selonc lor loi
Et la creance de lor foi
Com cil qui nont espoir de vivre
La ou il sont sain et delivre

[NB: "m" in last word, 25th line, is dotted; meaning unclear]