71v

En aucuns liex, si durement
Queles ses lievent contremont
Si que lair, deboutent amont
Et li airs qui est deboutes
Par force, et de son lieu boutes
Remuet lautre en itel maniere
Quil retorne ausi com arriere
Et sen vait ausi ondoiant
Comme laigue, qui vait corant
Car riens nest ou airs est meus
Tant que ses esfors, est cheus
Ensi vienent, souventes fois
Nues, plueves, tounoire, escrois
Et les choses, que dit avons
Si a encor autres raisons
Comment itels, choses avienent
Mais celes qui miex i avienent
Por entendre, legierement
Avons nous retraites briement
Sen laisserons, atans ester
Por le feu, de lair deviser
Dou feu et des estoiles qui sam
blent chair et dou dragon
li .xvii. capitles
Suer lair est li feus tout entor
Cest uns airs de grant resplendor
Qui par sa grant subtilite
Na riens de moistour, dedens se
Et est tant plus clers de cestui
Quil ne se puet pas prendre a lui

[initial: 25th row, opening initial /S/, 2 lines, in red with blue pen flourishing]