73r

Et le plus pesant enmi lieu
Cest la terre dont le fruis naist
Qui les gens, et les bestes paist
Et por ce bien, qui de lui ist
Et le fruit que ele norrist
Et les autres gens qui isont
Furent aucunes gens ou mont
Qui dirent que la terre estoit
Por le fruit qui deli naissoit
Et por le bien quen li habonde
Une des estoiles dou monde
Que diex assist ou firmament
En mi lieu, por estre plus gent
Si que en li tels choses fust
Qui ases biens partir peust
Por ce devroit bien cascuns faire
Chose qui adieu, peust plaire
Car tous les biens qui sont enterrre
Fist diex por nos amis a querre
Et que nous peussiens avoir
Ramembrance de son pooir
Et de sa debounairete
Dont il nous fist si grant bonte
Que avoir poons nous meisme
Ses biens, et sa gloire, saintisme
Mais puis que descrit vous avons
Les .iiij. helemens environ
Si vous dirons de cel air pur
Qui nous samble
Ausi cum lasur