75v

Et tant avecques ce encores
Le quart dun jor ce sont .vi. hores
Mais por ce que diversement
Eust li ans commencement
Li uns de jors, lautres de nuit
Car apluisors fust grans anuis
Fu cil quars de jor atornes
Uns jors outre, qui nommes est
Byssextes, qui, en .iiij. ans nest
Une fois dont nos vient parus
De .iiij. ans en autre .i. jor plus
Et lors rest en son premier point
Li solaus revenus apoint
Cest emmi mars querbe ragente
Que li novials tans recommence
Et toute riens trait en humour
Par la vertu, de son retor
Car en ce tans premierement
Ot li mondes commencement
Et por ce revient par nature
Cascune chose, a sa nature.
Sor le solail, a .iij. estoiles
Cleres, et luisans com chandoiles
Lune desous, lautre desus
Mars, jupiter, et saturnus
Qui detant plus hautement vait
Que en .xxx. ans son cercle fait
Icel .iij. jor vertus retienent
En choses, qui ca jus avienent