77r

Et si tres douche melodie
Quil nest nus sil lavoit oie
Que jamais vausist chose fair
Qui adieu fust, de riens contraire
Tant baeroit a parvenir
La ou il se peust tenir
Tous jors et avoir les oies
Si tres joiieuses melodies
Dont aucun furen qui disoient
Que li petit enfant looient
Quant il rient en lor dormant
Et dient quil oient le chant
Des angles dieu em paradis
Qui les ont, en tel joie mis
Mais de ce ne set nus le voir
Fors diex qui tout a savoir
Qui les estoiles ou ciel mist
Tel pooir avoir, lor a prist
Quen terre na chose diverse
Ne dedens mer tant soit perverse
Qui ou ciel ne soit compassee
Par estoiles, et figuree
Dont nus ne puet savoir le nombre
Fors diex qui per lui seul, les nombre
Et de chascune, set le non
Com cil qui tout
Fist, par raison
Destoiles, que on puet veoir
Puet on bien le nombre savoir
Et querre, par astronomie