79v

Quentre vos .ij. iels, na delonc
E le vous taura, pres et lonc
Aveoir plus, par devers li
Que na de largesce endroit li
Et se la chose est toute oiels
Au lonc quest entre vos .ij. iels
Autant vos entaura avant
Com cele chose, amains de grant
Se la chose amains de grandor
Quentre vos iex, na de longor
Mains vous taura, veoir ades
Que se fust large ou lons, ou pres
De ce que vous veoir porres
Et quant vous la chose metres
Pres de vos iex, tant porres plus
Veoir de cele chose ensus
Tant que veoir la poes toute
Ensi est dou solail, sans doute
Qui terre passe, de grandor
Si quil voit tout le ciel entor
Et les estoiles clarte rent
Quanquil ena, ou firmament
Por quoi on ne voit les estoiles par jor
Tout ades, deseure, ou desous
Mais celes, qui sont desous nous
De jors ne poons nous veoir
Car cil nous entant, le pooir
Par sa clarte, qui est si grans
Si com de chandoiles ardans
Quensus de nous par nuit verrions

[initial: 24th row, opening initial /T/, 2 lines, in blue with red pen flourishing]