82r

Mais por ce est ele si ensus
Dou solail com ele pert plus
En son cercle, par dautre part
Droitement devant son esgart
Si que la plus, enluminee
Est toute devers nous tornee
Et lors est la terre, entriaus deus
Si nes puet on veoir andeus
Sor terre, se molt petit non
Mais dun des .ij. veoir puet on
Dusquau couchier, puis que il naist
Et li autres, desous terre est
Tant que repert, vers oriant
Et lors vait, o celui couchant
Por ce nes puet on pas veoir
Andeus ensamble main et soir
Mais la lune, qui apres fait
Lamoitie de son cors, sen vait
A dont dou solail aprochant
Et sa clarte amenuisant
Tant quele nous apert demie
Si com en la quarte partie
Car lors a ele .iij. quartiers
De son cercle ales tous entiers
Et est ou solail si prochainne
Com ala quarte premerainne
Mais ades sen aproche plus
Tant que cornue, apert ca jus
Et dautre part si com devant
Ensi sen vait, tout defaillant