83r

Mais la lune, qui pas ne vait
Si droit comme li solaus fait
Passe aucune fois, par tel voie
Que la terre, toute lombroie
Car la terre est, plus grans de li
Et por ce lombroie ele ensi
Car entrials deus, a une ligne
Tant que la lune, se decline
Tant que ses cors est plus luisans
Et lors se fiert, li solaus ens
De ses rais, et clarte li rent
Par quoi sa lumiere si prent
Mais quant passe mains par cel ombre
Tant li taut il mains et encombre
De la clarte, quele recoit
Dou solail quel part quele soit
Fors quant alombre se doit prendre
Si poes ce ensi entendre
Sune ligne passoit, parmi
La terre, par le point enmi
Et outre dambes .ij. pars fors
Et passast tout outre le cors
Dou solail tout par droit esgart
Li autres chies par droit esgart
Qui durroit de terre ausi long
Passeroit tout parmi le coing
De lombre tous jors par ici
La lune par verte vous di
Deca et dela chascun mois
Passe parmi, aucune fois