84v

Si est tendue cele ligne
Dont soventes fois se decline
La lune ou de ca ou dela
Chascun mois com cele qui va
Par desous le solail ades
Mais quant de cele ligne est pres
Quele passe tout droit par mi
Si nous taut le solail ensi
Si que veoir nel poons pas
Tant com ele est, en ce pas
Car lors fait ele alaterrre ombre
Qui les rais dou solail encombre
A venir cele part sor terre
Ou endroit au solail se serre
Et cil qui lors sont cele part
Ont lombre, devers lor regart
Mais napert, pas communement
Par tout le monde a toute gent
Car la lune si grans nest mie
Com la terre, de grant partie
Por ce pas toute, ne sombroie
Fors la ou ele chiet en voie
De la ligne, quant droit si serre
Parmi le solail, et la terre
Dont li phylosiphe soloient
Aler tout la, ou il savoient
Quil avoient quis par lor sens
Por prover les jors et le tans
Et les choses, qui avenoient
Dont maint grant afaire esprovoient