90v

Ses chalors, et puis li engraignent
Selonc ce, que sont pres ou loing
Si ont aucune fois, besoing
Ausi com on voit, dun grant roi
Qui plus est sires endroit soi
Par sa hautesce, et plus puissans
Que nus autres hom, de ses gens
Et si li ont sovent mestier
Com cil qui li doivent aidier
Car com plus est pres de sa gent
Tant est il plus fort et poissant
Et com plus de sa gent ses longe
Tant fait il mains de sa besoigne
Dou solail autretel vous di
Quil est si com aves oi
Des estoiles li plus poissans
Et plus vertueus, et plus grans
Dont en terre a, plus de pooir
Que autre estoile ipuisse avoir
Les autres lor pooir i ont
Chascune, si com eles sont
Mais puis, que conte vous avons
Au plus briement que nous savons
De la vertu dou firmament
Si vous dirons, apres briement
Comment fu mesures li mondes
En hautes choses, et parfondes
De lonc, de le, de toutes pars
Par cials qui seurent, les .vij. ars
Dont geometrie, en est une