93r

Chascuns asa nature faire
Si seroit ce, chose legiere
Sil i voloient lor maniere
Atorner, ausi com il font
A faire ce, qui les confont
Cest avoirs, dont il ont en vie
Dont porchacier cuident lor vie
Por assambler, les grans tresors
Dont il porchacent plus lor mors
Car li grant tresor quil assamblent
Lor sens et lor cors, si lor emblent
Qua droit ne se pueent mener
Ne lor afaires, ordener
Por vivre ensi com il deussent
Dont ades plus a aisie fussent
Et vesquissent plus longement
Et au gre dieu, plus savement
Mais tant aunent, grant avoir
Que ce qui miex lor doit valoir
Nesai por quoi lavoir conquierent
Cest laise dou monde, quil quiererent
Et perdent tout por gaaignier
Et quant miex sen cuident aidier
Et estre a aise, et a honor
Lors muerent il a grant dolor
Car la paine, et la covoitise
De la mort ou tous jors ont mise
Toute lor entente, et lor cure
Sans ordenance, et sans mesure
Les a plus tost menes amort