116r

De sa gloire, de sa bonte
De ce vous avons nous conte
Et rendu aucunes raisons
Au plus briement que nous savons
Car nont cure de longue gloses
Les gens dore, mais de bries choses
Comme cil qui sont de brief sens
Car lor nature est de brief tans
Bries sont lor cors, bries sont lor vies
Car en peu de tans sont fenies
Et tous jors plus brief devenront
Dus quatant qua noient venront
Car cis siecles empeu de tans
Trespasse tout ausi com vens
Et defenist, de jor, en jor
Chascuns i fait petit sejor
Cartant est plains de vanite
Que riens ni a de verite
Cil qui plus demorer icuide
Est sovent cil quancois le vuide
Et plus tost muert por ce fait bien
Qui tant com il vit fait le bien
Car il nest qui sache aquele eure
Lamors li doie corre seure
Tels se cuide molt bien esbatre
.V. ans et bien sa coupe batre
Quen mains de .v. jors est ales
Et ou puis denfer avales
Si est sages, et bien apris
Qui ou service dieu est pris