35v

[Column A]

En lair est li feus tout entor
cest uns air de g[ra]nt resplendor
& de m[ou]lt g[ra]nt nobilite
Qui p[ar] sa g[ra]nt sostillete
Na rie[n]s de moistor dedenz lui
& est tant pl[us] clerz de cestui
& tant de pl[us] soutilg nature
Con cist airs est v[er]s eue pure
Ou co[m]me eue env[er]s la t[er]re est
Cil airs ou nule moistor nest
Jusq[ue] a la lune sestent
Desouz cel air voit len souve[n]t
De feu cler unes estencelles
Q[ui] semblent estoiles isneles
Dont la gent dient q[ue] ce sont
Estoilles qui courant sen vont
& se remuent de lor leuz
Mes nou sont ainz est aucu[n] feus
Q[ui] en lair nest dune vaspor
Seche qui a poi de moistor
Dedenz lui qui mo[n]tre i est
De la t[er]re dont ele nest
P[ar] le souleilg qui sus la tret
& q[ua]nt ele est trop haut si let
& esprent ausin co[m] chandoile
Puis chiet en lair moiste & estai[n]t
Car la moistor de lair la vaint
& q[ua]nt grosse est & li airs ses
Si sen vient tout ardant ades
Jusq[ue] a la t[er]re dont souvent

[Column B]

Avient q[ue] cil qui vont najant
P[ar] nuit ou q[ui] p[ar] t[er]re vont
Maintes foiz trouvees les ont
& les voient toutes ardanz
Cheoir jusq[ue] a t[er]re luisanz
& q[ua]nt la venoient p[our] prendre
Si trouvoient si co[m]me cendre
Ou co[m]me une fuelle pourie
Dun arbre q[ui] seroit moillie
Si ne croient pas bie[n] adroit
Cil qui cuide questoille soit
Estoille ne puet pas cheoir
Car toutes les convient movoir
En lor cercle ordeneement
Nuit & jor a des igalment dou drago[n?]
Li dragons nest nule autre chose
fors q[ue] une vaspor seche enclose
Quen aucun leu sa semble en haut
Q[ue] aucune fois avient p[ar] chaut
& q[ua]nt esp[ri]s est si semuet
& sen vait au pl[us] droit q[ue] puet
Co[m]me feus qui est eslaissiez
Jusq[ue] a tant q[ue] a t[er]re est baissiez
Issi sen vet cil feus volant
Tant q[ue] dan q[ue]s vient a noient
Tiex choses ont senefiances
En t[er]re daucunes muances
Dou feu v[ous] avons briement dit
& les . iiij . elemenz descrit
[Com]m[en]t lune en lautre est asis
Si co[m] p[ar] Dex font establis