42v

[Column A]

Son movoir tout ausint seroie[n]t
Q[ue] james ne se remouvroient
Tant q[ue] ciel ravroit movem[en]t
& lors reseroit movement
& qui lors de sens ses porroit
Viser & veoir qui seroit
M[ou]lt pourroit veoir de sembla[n]ces
& de div[er]ses contenances
Es autres genz q[ui] ausint seroie[n]t
Q[ui] remuer ne se pourroient
Se mouem[ent] on ciel neust
Il nest riens qui vivre peust
En t[er]re car Dex ne voudroit
Q[ui] tout veut establir p[ar] droit
Ainsint vout Dex former le mo[n]de
En qui toute droiture hab[o]nde
Ainz riens p[ar] lui faite ne fu
A cui il ne donast v[er]tu
Tele co[m]me ele doit avoir
Autrement eust il p[our] voir
Fet aucune riens p[our] noient
& sanz raison outreement
Mes il ne le fist pas usi
Car nule riens ne li fali
Les estoilles fist & crea
& a toutes v[er]tuz donna
& qui ainsint ne le vout croire
En lui na raison ne memoire
Car nos veons ap[er]tement
Q[ua]nt la lune lumiere prent
& nos la veons toute plaine

[Column B]

Si na li hons menbre ne vaine
Q[ui] pl[us] ne soit plaine dumors
Q[ue] lors q[ua]nt ele est en decors
Aussint avient de toutes bestes
Q[ui] pl[us] ont plains molles & testes
Nis la mer meismes sen enfle
& en son decorz se desenfle
Tant q[ue] ce vient ou mois ap[re]s
Dont cil q[ui] de la mer sont p[re]s
Q[ua]nt la lune doit estre plaine
Chascuns dans sa maisnie amaine
& sesloignent de lor manoir
Ou il vont en hauz leus manoir
Tant q[ue] la mer se vuet ariere
Chascun mois font en tel maniere
& tout ce avient p[ar] la lune
Q[ui] des •vii• planetes e[st] une
Si voit len dou souleilg ausi
Q[ue] q[ua]nt il ap[ro]che deci
& il en co[m]mence a monter
Si fait la t[er]re fruit porter
& fet aparoir fuelle & flor
& revenir toute verdor
& oisel co[m]mencent lors chanz
P[our] la doucor dou novel te[m]ps
& qnt il prent a rabaissier
Si nos fet yver aprochier
& fet fuelle & flor faillir
Tant quil se prent a revenir
Puis q[ue] ces •ii• estoilles ont
Tex v[er]tuz q[ue] tex choses font