43r

[Column A]

Les autres q[ue] on ciel sont portraites
Ne furent pas p[our] noient faites
Ainz a chascune sa droiture
& sa v[er]tu lonc sa nature
Porquoi les div[er]setez font
Es choses qui en t[er]re sont
& les remuances des tens
Li uns vient tart lautre p[ar] tens
Des fruiz dont len voit avenir
Lun en tost lautre tart cuellir
Q[ue] un en sont pl[us] tost meur
Q[ue] un autre & pl[us] asseur
Tempestes & autres grevances
Si font assez dautres musances
Q[ue] uns estez est moistes & douz
& uns autres ses & ventoz
Des yv[er]s ravient il souvent
Q[ui] se changent delor couvent
Q[ue] li uns est frois & pluieus
Pl[us] q[ue] uns autres & enuieus
& uns autres mains sanz p[er]il
Lun temps voit le[n] chier lau[tr]e vil
Daucuns riens & puis voit on
Q[ue] ce dont il fu poi cel an
Q[ue] en un autre en a g[ra]nt plente
& ce q[ue] en un tens est plente
Revient miaus ou pis tout ades
Q[ue] en cel te[m]ps devant ou ap[re]s
Toutes ces div[er]setez font
Les estolles qui on ciel sont
Mes cest p[ar] la volente Dieu

[Column B]

Q[ui] chascune a mise en son leu
Ou son corz fet naturelm[en]t
& chascune div[er]sement
Car sautre rie[n]s navoit sons us
& temps fors li soulaus sanz pl[us]
Co[m]me cil q[ui] vet igalment
Chascun en p[ar] le firmament
& lun este autant monte
Co[m]me il fet lautre p[ar] tel conte
Q[ue] en toz yv[er]s autant descent
& chascun jor vet igalment
Tant quil revient tretour apoi[n]t
Lautre en ap[re]s en son droit poi[n]t
Ou devant fu ce sevent bie[n]
Cil qui sont astronomien
Q[ui] vet chasq[ue] en le ciel entor
& la ou il est hui cest jor
Resera il dui en un en
La meismes p[ar] ce set len
Q[ue] sautre estoille mavoit
Som povoir autrem[en]t iroit
Tuit li en seroient semblant
Chascuns tel co[m] il fu avant
& li mois se resembleroient
Chascun ainsint co[m]me il vendroie[n]t
Un ianvier & lature ianvier
& fevrier & lautre fevrier
& des autres •x• mois ausi
Car li soulaus vet tout aussi
En un mois co[m]me il fet ap[re]s
Q[ua]nt en cel mois rest ausint p[re]s