45r

[Column A]

P[ar] assembler les g[ra]nz tresors
& il porchacent pl[us] lors mors
Car li g[ra]nt tresor quil assemblent
Lor sens & lor cors si lor emblent
Q[ar] droit ne se puent mener
Ne lor afaires ordener
P[our] vivr ainsint co[m]me il deussent
Dont touz jors pl[us] a aise fusent
& vesquisent pl[us] longuem[en]t
& au gre Dex pl[us] sauvement
Mes ta[n]t aiment ganier davoir
Q[ue] ce q[ui] miauz lor doit valoir
Ne sai p[our]coi lavoir co[n]quierent
Cest lese dou monde q[ui] quiere[n]t
P[ar] dent p[our] lor gaaignier
Car q[ua]nt miex sen cuident aidier
& estre a aise & a sejor
Lors muerent il a g[ra]nt dolor
Car la paine & la couvoitise
De lavoir ou toz jorz lont mise
Toute lor entente & lor cure
Sanz ordenance & sanz mesure
Les a pl[us] tost menez amort
Si sont ore mainte gent mort
Q[ue] se lor aferes eussent
Ordene si co[m]me il deussent
Chascun jor a ore establie
Q[ui] encore fusent en vie
Riche & puissant & sain & fort
Ainsint se hastent de lor mort
Car nature ne puet soufrir

[Column B]

Longuement div[er]s maintenir
Ne les soudaines remuances
Quil font p[ar] lor foles enfances
Ne a Dex ne plaisent de rien
Car il nem puet venir nul bie[n]
Pl[us] aiment gaaig davoir fere
Q[ue] chose q[ue] a Dex puise plere
Ja riens p[ar] ordre ne feront
Lun jor matin au most[ier] vont
Lautre jor tart ou a tele ore
Q[ui]l cuident q[ue] tart lor demeure
De lor autre besoigne fere
La ou il cuident lor gaaig faire
Ainsint niront ja Dex proier
Fors q[ua]nt mains cuident gaaign[ier]
& mainz gaainent il sanz faille
Car il servent Dex de la paille
& Dex paille jor entendra
Q[ui] lor gaaig chier lor vendra
Dont il le laissent a servir
Q[u]en un seul jor lor puet merir
Pl[us] q[ue] gaanier ne pouroient
En m[il] anz sa des gaaignoient
Tel gent sont de fol essient
Qui servir cuident de noient
Celui qui tout set & tout voit
& qui toz lor porpens connoist
Onquor q[ua]nt mainz vont au most[ier]
Ni vont il pas tant p[our] proier
Co[m] p[our] le los dou monde avoir
& proient pl[us] p[our] lor avoir