50v

[Column A]

Maint autres q[ua]sez de bie[n] sorent
Q[ui] cerchere[n]t le mo[n]de ou q[ui]l pore[n]t
P[our] miaus co[n]noistre mal & bie[n]
Si ne sesp[ar]gnoient de rien
Ne voloient pas sitost croire
Chose quil ne trovassent voire
Ne quanqz lor livre disoient
Jusq[ue] a tant ques p[ro]ve lavoie[n]t
P[our] miex Dex counoistre & amer
Ainz cerchoient & t[erre] & mer
Tant q[ue] tout encerchie avoie[n]t
Puis ariere sen repairoient
A lor estuides p[our] toz jors
Clergie aprendre & bone mor[s]
Si amoient philosophie
P[our] auz [con]noistre & droite vie
& p[our] ce q[ue] nome lavons
Aucune fois v[ous] descrirons
Quel chose philosophie est
Dont la g[ra]nt sapience nest
Q[ui] lome puet a ce mener
De lui conoistre & Dex amer
Q[ue] philosophie est & d[e] la respo[n]se d[e] Platon
Philosophie est co[n]noissance
& fine amor de sapience
Des choses savoir les [com]munes
Des humaines & des devines
P[our] connoistre lui & son estre
Quex il est & q[ui] ex il doit estre
Si q[ua] ce se puisse mener
Q[ue] toz se puisse a Dex torner

[Column B]

Q[ui] bien conoist lui & sa vie
Si set toute philosophie
Tuit cil q[ue] philosophe sont
Q[ui] daus droite co[n]noissance ont
Dont Platon respondi aucun
Q[ui] li demanda en q[uo]mun
Sire Platon quavez ap[ri]s
Q[ui] tant avez vostre tens mis
En estuidie p[our] aprendre
Quel bie[n] nos ferez vos ente[n]dre
Car nos dites aucun bon mot
& Platon q[ui] pl[us] q[ue] nul sot
Li dist si co[m]me a cuer dolent
Quil navoit riens ap[ri]s for tant
Quil se sentoit & jor & nuit
Ausint c[om]me uns vaisiax tout vuit
Tant lor en respondi Platons
& si fu li pl[us] sages hons
De pl[us] g[ra]nt science p[ar]fonde
Q[ue] en seust lors en tout le mo[n]de
Nen diroient pas ore autant
Maint ainz en feroient senblant
Q[ui]l seusent toute clergie
P[our] lor avoir q[ui] mal les guie
& lor muet lor folie en testes
Q[ui]l nentendent bie[n] ne q[ue] bestes
& quant sevent aucune riens
Q[ue] aucune fois lor semble biens
Maintenant cuide tout savoir
Qaunqz fox pense nest pas voir
Deceu sont co[m]me li fox.