f. 059v - 060

Sire sont li chiclopien
Qui de courre passent le vent
Dont la plante est longue et large
Quil sen cueurent con dune targe
Et sen aombrent pour le chaut
Quant desus eus se tient en haut
Un autre i sont qui nont cun oeil
Enmi le front cler et vermeil
Sira .i. autre qui le vis
Et la bouche enmi le pis
Et un oeil en chascune espaule
Que le nes et la bouche avalent
Et ont saie sus le musel
Tout autresi coume pourcel
Si i a vers le flueuve grange
Une gent cortoise estrange
Et ont drete feture dome
Qui de lodeur daucune pome
Suivent sans plus et si vont loing
La poume leur tel besoing

Que se male pueur sentoient
Sans la poume tantost morroient
Des serpense dynde
En ynde a serpens de ce force
qui les cers deveurent aforce
Sira une autre beste encore
Que len la pele le castore
Corne ont de cerf enmi le vis
Et de lyon cuisses et piz
Piez de cheval oreilles grans
Qui li croissent en lui dedens
Bouche roonde et le musel
Ausi con le chief dun tonel
Les euz lun de lautre bien pres
Et a voiz dome par un pres
Si a une autre pire beste
Cors de cheval de cenglier teste
Et queue dun olifant
Deus cornes u coste devant
Dont lune sus son dos abat