f. 077v - 078

Daufrique et de ses contrees
Apres europe est est aufrique
dont le premerain chief est libe
Une terre riche et garnie
Et puis la terre de sulie
Jheruselem et le pais
La ou dieu fu et mors et vis
Grece romanie et toscane
Gascoigne lombardie espagne
Alixandre et maint bon pais
Et autre que pas ne devis
Si a citez et regyons
Qui de bestes prennent leur nons
Qui habitent en ce pais
Dont les bones citez ont pris
Dont roume a forme de lyon
Troie de cheval ce dit on
Ethiope est de vers la fin
Daufrique qui ilec prent

En ce pais a une gent
Plus noirs que poiz ne arrement
Car il fet tel chaut cele part
Que il semble que la terre art
De la ethiope na rien
Fors que mer et terre sanz bien
Bestes sauvages et vermine
Et vers la grant mer se termine
Daufrique et de ses contrees
Puis que descrite avons la terre
si devons de isles enquerre
Cele que nos savon nomer
Dont il i a maintes par mer
Contre europe est anidos
Une grant ille et puis caldos
Ou la toison dor fu trovee
Con laventure fu contee
En cele estoire de reson
Une autre isle a non noion
De cele fu seint denis nez
Qui en france fu decolez