f. 081v - 082

La vermine iest tantost morte
Une autre i a bien loing en mer
Ou fame ne puet habiter
Nes li oisel qui sont femeles
Si sen tornent tost ensus deles
Si ra une autre ou nules gens
Ne puent morir morir a nul tens
Mes quant il sont viel et crollant
Et de leur menbres soudivant
Quil ne se pueent soustenir
E t quil ont plus chier a morir
Qua vivre si se font porter
En autre leu pour devier
Outre en une autre qua non tille
Li arbre qui sont en cele ille
Tiennent leur fueilles en verdor
Yver et este a touz jourz
Cele part na cun jour en lan
Dont la nuit dure demi an
Sis mois a len de nuit oscure

Puis vient le jor qui .vi. mois dure
En irlande a .i. autre leus
Qui nuit et jour art comme feus
Que len apele purgatore
Et ainsi lapele on encore
Que sil viient aucune gent
Qui ne soient bien repentant
Tantost est raviz et perduz
Quen ne set quil est devenuz
Sil est confes et repentanz
Si vet et passe mainz tourmenz
Et sespurge de ses pechiez
Quant plus en a plus li est gries
Si come revenus en est
Nule riens james ne li plest
En ce monde james nul jour
Nen ira mes toz jorz em plour
Ainz gemissent les max que font
Et les pechiez que les gens ont
En cele isle a ^.i. feu mout grant