British Library Harley 2277

SEint Dunstan was of Engelond  icome of gode more Miracle oure louerd dude for him  er he were ibore For þo he was in his moder wombe  a candelmasse day Þer folc was at churche ynouȝ  as to þe tyme lay As hi stode mid here liȝt  as me doþ ȝut nou Here liȝt aqueynte oueral  here non nuste hou Her riȝt hit brende suype wel  ⁊ her riȝt hit was oute Þa^t folc stod in gr^et wonder  ⁊ also in gr^ete doute {[top margin: illegible]} {[right margin: in a later hand:] For ... [ in another later hand:] O lorde and father ..yes ...... servaunt[?] J. .. Sanford}

{Don} And hi speke ech to oþer  in whiche manere hit were Hou hit queynte so sodeynliche  þe liȝt þa^t hi bere ¶ As hi stode ⁊ speke þerof  in gr^et wounder echon Seint Dunstanes moder taper  afure worþ anon Þa^t heo huld on hire hond  heo nuste whannes hit com Þa^t folc stod ⁊ bihuld  ⁊ gret wonder þerof nom Ne non nuste wannes hit com  bote þurf oure louredes gr^ace Þerof hi tende here liȝt  alle in þe place ¶ What was þa^t oure louerd crⁱst  þe liȝt fr^am heuene sende ⁊ þa^t folc þa^t stod aboute  here taperes þerof tende Bote of þa^t holi child  þa^t was in hire wombe þere Al Engelonde scholde þe bet beo iliȝt  þa^t hit ibore were Þis child was ibore neoȝe hondred ȝer  ⁊ fyue ⁊ tuenti ariȝt After þa^t oure suete louerd  in his moder was aliȝt Þe furste ȝer of þe crouning  of þe king Adelston His moder het Kenedride  his fader Herston ¶ Þo þis child was an vrþe ibore  his freond nome þerto hede Hi lete hit do to Glastnebury  to norischi ⁊ to fete To teche him eke his bileue  pater noster ⁊ crede Þe child wax ⁊ wel iþeȝ  for hit moste nede ¶ Lute ȝeme he nom to þe wordle  to alle godnisse he drouȝ Ech man þa^t hurde of himm speke  hadde of him ioye ynouȝ Þo he was of manes wit to his vncle he gan go Þe archebischop of Canterbury  seint Aldelm þat was þo Þa^t makede wiþ him ioye ynouȝ  ⁊ euere þe lengere þe more Þo he seȝ of his godnisse  ⁊ of his wyse lore For deynte þa^t he hadde of him  he let him sone bringe Bifore þe prⁱnce of Engelond  Adelstan þe kynge Þe king him makede ioye ynouȝ  ⁊ gr^antede al his bone Of what þinge so he wolde bidde  if hit were to done Þo bad he him an abbei  þa^t he was forþ on ibroȝt In þe toun of Glastnebure  þa^t he ne wornde him noȝt ¶ Þe king gr^antede his bone  ⁊ after him also Edmund his broþer þa^tt was king  in his poer ido To Glastnebury wende sone  þis gode man seint Dunstan Þo beye þe kynges him ȝeue leue Edmund ⁊ Adelstan ¶ Of þe hous of Glastnebure  a gr^et ordeynour he was ⁊ makede moche of gode reule  þa^t neuerer among hem nas

At þa^t hous þa^t furst bigonne  four hondred ȝer bifore ⁊ eke þreo ⁊ vyfti  er seint Dunstan were ibore For þer was ordre of monekes  er seint patrik com ⁊ er seint Austyn to Engelonde  brouȝte crⁱstendom . ⁊ seint patrik deide tuo hondred  ⁊ trio ⁊ vyfti ȝer After þa^t oure suete leuedi  oure louerd here ber At none monekes þer nere furst  bote as in hudinge echon ⁊ as men þa^t drowe to wyldernisse  for drede of godes fon . ¶ Seint Dunstan ⁊ seint Adelwold  as oure louerd hit bisay I ordeyened to preostes were  al in one day Þer after sone to Glastnebury  seint Dunstan anon wende He was abbod þer ymaked  his lyf to amende ¶ ⁊ for he nolde bi his wille  no tyme idel beo Aprⁱuei smyþþe bi his celle  he gan him biseo For whan he moste of oreisouns  reste for werinisse To worke he wolde his honden do  to fleo idelnisse Sin he wolde poure men  þe wyle he miȝte deore Al þe dai for þe loue of god  he ne kipte of hem non hure ⁊ whan he sat at his worc þer  his honden at his dede ⁊ his his hurte mid ihesu crⁱst  his mouþ his hedes bede ¶So þa^t al at one tyme  he was at preo stedes His honden þer his hurte at god  his mouþ to bidde his bedes Þerfore þe deuel hadde of him  gr^et enuye ⁊ ȝonde O tyme he cam to his smyþþe  alone him to fonde Riȝt as þe sonne wende adoun  riȝt as he womman were ⁊ spac wiþ him of his worc  wiþ laȝinge chere ⁊ seide þa^t heo hadde wiþ him  gr^et worc to done Treoflinge heo smot her ⁊ þer  in anoþer tale sone ¶ Þa^t holi man hadde gr^et wonder  þa^t heo was ⁊ þere He sat longe ⁊ biþoȝte him  longe hou hit were He biþoȝte him ho hit was  he droȝ forþ his tonge ⁊ leide in þe hote fur  ⁊ spac faire longe Forte þe tonge was al afure  ⁊ siþþe stille ynouȝ Þe deuel he hente bi þe nose  ⁊ wel faste drouȝ He tuengde ⁊ schok hire bi þe nose  þa^t þe fur out blaste Þe deuel wrickede her ⁊ þer  ⁊ he huld euere faste He ȝal ⁊ hupte ⁊ drouȝ aȝe  ⁊ makede grⁱslich bere He nolde for al his biȝete  þa^t he hadde icome þere {[top margin: illegible]} {[right margin: in later hand] Jo. Sanford ....} {[bottom margin: in later hand] Aaa Bbb Ccc Ddd Eee }

{Don} Mid his tonge he snytte hire nose  ⁊ tuengde hire sore For hit was wiþinne þe nyȝte  he nemiȝte iseo nomore Þe schrewe was glad ⁊ bliþe ynouȝ  þo he was out of his honde He fleȝ ⁊ gr^adde bi þe lifte  þa^t me hurde into al þe londe Out what haþ þe calewe ido  what hap þe calewe ido In þe contira me hurde wide  hou þe schrewe gr^adde so As god þe schrewe hadde ibeo  acome ysnyt his nose He nehiȝede nomore þiderward  to hele him of þe pose ¶ Þe holi abbot seint Dunstan  hadde gr^et poer Wiþ king Edmund þa^t was þo  ⁊ was al his consailler After king Edmundes deþ  a good while was a gon Þa^t Edwyne his sone was ymaked king  ⁊ noȝt after anon Þis Edwyne hadde vuel red  ⁊ þer after drouȝ Wiþ seint Dunstan he was wroþ  siker wiþ gr^et wouȝ ¶ Of his Abbey he dude him out  ⁊ dude him schame ynouȝ Þe more schame þa^t he him dude  þe more þe gode man louȝ He drof him out of Engelond  ⁊ let him grede fleme Þis gode man wende forþ wel glad  ne nam he neuere ȝeme To þe abbey of seint Amand  biȝunde see he drouȝ ⁊ soiournede þer longe  ⁊ ladde god lyf ynouȝ ¶ After kyng Edwynes lyue  Edgar þa^t was his broþer Was king ymaked for he was nher þan eni oþer Suyþe god man he bicom  ⁊ louede wel holi churche ⁊ ech man þa^t him þerto radde  after him be gan wirche Me tolde him of seint Dunstan  þa^t his broþer drof of londe Mid vnriȝt for his godnisse  ⁊ gan him vnderstonde ¶ After him he sende anon  þa^t he come aȝe sone ⁊ bileue his consailler  of þa^t he hadde to done Seint Dunstan com hom aȝen  ⁊ faire was vnderfonge Ladde his Abbey al in pees  fr^am whan he was so longe Wiþ þe king he was suyþe wel  ⁊ was al his consailler Moche me spac of his godnisse  boþe fur ⁊ nher Hit biful þa^t þe biscop  of wircetre was ded Þe king ⁊ þe archebischop Ode  þerof nome here red ¶ Þo þe holi abbot seint Dunstan  bischop hi makede þere To makie him heȝere in godes lawe  his wille þeȝ hit nere Somme eschte þe archebischop  of Canterbury sire Ode Wherfore hi him bischop makede  ⁊ his gr^a were so gode

{ston} For he schal qu^aþ þis gode man  after me her beo Archebischop of Canterbury  þa^t me schal iseo ¶ What saistou þis oþer seide  þu spext folliche iwis Nostou nomore þan þi fot  vppe god al hit is ¶ Ne one freond qu^aþ þis gode man  nepore ȝe me blaim noȝt Wel i^ch wot what mi louerd crⁱst  in mi mouþ haþ ibrouȝt Is ho saiþ of þulke þinge  þa^t he haþ in mie ised To elle i^ch mai what schal bifalle  after þa^t ich am ded Bischop he was of Londone ⁊ Wircetre  ⁊ hulp boþe tuo Of Londone ⁊ of Wircestre  ⁊ bischop was of boþe also ¶ Hit biful þa^t þe archebischop  of Canterbury was ded Þe pope ⁊ þe kyng Edgar  þerof nome here red ⁊ makede þe gode seint Dunstan  archebischop þere Gode men þa^t him iknewe  wel glad þerof were Cristendom in Engelond  to god stat he drouȝ And riȝtes of holi churche  he huld vp faste ynouȝ He fondede þurf al Engelond  þa^t ech persoun schulde cheose To witien him fr^am lecherie  oþer his churche leose ¶ Seint Osewold was þulke tyme  bischop of wyrcestre ⁊ seint Adelwold also  bischop of Roucestre Þis tuei bischopes ⁊ seint Dunstan  were al at one rede ⁊ Edgar þe gode king  to do þis gode dede ¶ Þis þreo bischops wende forþ  þurf al Engelonde ⁊ eche liþer persoun caste out  þa^t þer nemiȝte non atstonde Here churchen ⁊ here oþer god  clanliche hi bynome ⁊ bisette hit in pore men  þurf þe popes gr^ant of Rome Eiȝte ⁊ fourti abbeyes of monekes ⁊ of nonne Of þe tr^esour hi arerde in Engelond  of persones so iwonne So hit was wel bet biset  þan hit was er in schrewe For whanne gode maistres beoþ  som god hi wolleþ schewe ¶ Gode were þis þreo bischops  þa^t o tyme were þo Þe betere is Engelond for hem  ⁊ worþ euere mo ¶ Oure louerd ȝaf an vrþe  seint Dunstan faire gr^ace Þa^t o tyme as he was  in a prⁱuei place His fader ⁊ his moder ek  in þe ioye of heuen anheȝ After þa^t hi dede were  aperteliche he seȝ Wel gr^at loue oure louerd him cudde  whan he schewede þere So moche of his prⁱueite  þe while he alyue were {[right margin: in later hand] Vt ait Homes[?] ......} {[bottom margin:] O sord[?]}