6

{Donstan}
As he lay anoþer tyme  in his reste anyȝt
He seȝ þe ioye of heuene  ⁊ þe place þerinne wel briȝt
Angles he hurde also singe  a murie song þer inne
Þa^t me singeþ ȝut in holi churche  whan me doþ þe masse singe
Kirieleysson . christeleyson  was þe murie note ⁊ song
Þis holi man þa^t þis ihurde  ne þoȝte hit him noȝt longe
¶ Wel auȝte he to heuene come  after his ende day
Whan he þe while he was alyue  so moche of heuene isay
Harpe he louede suyþe wel  þeren he couþe ynouȝ
A day he sat in solaȝ  ⁊ a lay þeron drouȝ
¶ Þe harpe he heng bi þe wowe  þo hit was tyme to ete
Þo hit was ȝare þerto ibrouȝt  he sat adoun at his mete
Of heuene he gan þenche sone  of þe ioye þa^t was þere
Of þe ioyfulle blisse þa^t þer was  of halewen þa^t þer were
He sat as he were ynome  so moche þeron he þoȝte
His harpe he heng bi þe wowe  of wham he licte roȝte
Bigan to cuþe his holi þoȝt  ded treo þeȝ hi were
¶ As oure louerdes wille was  as hi hurde alle þat þer were þere
Al bi him silue he gan to harpe  amurie steuene iwis
Þat me singeþ ȝut in holi churche  þa^t an englisch is þis
Alle halewene soule glade beoþ  þa^t in heuene beoþ ido
Þa^t suyeþ oure louerdes way  ⁊ for him schadde also
Here blod for his suete loue  þerfore hi schulle wone
⁊ kynges beo bouten ende  wiþ crⁱst godes sone
Þis anteyn þa^t murie is  þa^t folc ihurde alle
Hou þe harpe song albi him silf  þer he hong bi þe walle
Fair gr^ace oure louerd him schowede þere  whan þe dede treo
So schulde singe of þulke ioye  þa^t he scholde inne beo
Louerd ihered beo þi gr^ace  ⁊ þi miȝte also
Þa^t þu woldest her alyue for him  such miracle do
¶ Þo þis holi man hadde ylyued  an vrþe meni adai
⁊ his endedai was neȝ icome  as he him silue isai
A holi þursday he worþ sik  as hit ful in þe ȝere
He let offende his freond  þat specials to him were
His men þa^t him seruede ek  he let hem clipie also
⁊ for ȝaf hem al here trespas  þa^t hi him hadde misdo
⁊ assoillede hem of here sinne  ⁊ in godes bendes lay
And so he lay al þulke tyme  ⁊ also þane friday
{[bottom marginalia:]si thos ??}
{[left side marginalia in late hand unreadable]}