47

94

ilerüye geçmekte olduklarından sebt ve tahrîrlerine i‘tinâ olunamamağla cedvelde
yalnız karantina tarafından yoklamaları icra olunan mikdârı gösterilmiştir.

Acem Züvvâr ve Tüccarının Yolsuz Hareketlerinden Zuhur Eden Ta‘affünât

Acem tebe'ası Hacı Kara karyesinde olduğu bâlâda zikr olunan Kervânsarâya dârâ-dâr sığışmak mümkün olduğu halde âhar mahallere konmayup be-heme-hâl hân-ı mezbûra konmak mültezimleri olduğundan ve eğerçi hân-ı mezbûr Acemler'in yolcularına mahsûs olarak hayrât yapılmış ise de tathîr ve tanzîfine bir güne mahsûsâtı olmadığından başka yolcular ta‘âm pişirdiklerinde atılacak zevâ’idi hânın şurasına burasına attıklarına ve derûnunda hâlâ dedikleri şey nâ-bûd ve def‘-i tab‘ için bulunduğu yerden [138] taşra çıkmak âdeti tabâyi‘-i İrâniyân'da mefkûd olmağla rast geldikleri yere pislediklerine mebnî hân-ı mezbûrun her vakit derûnu murdarlık ile memlû ve meşhûn bulunarak bu keyfiyyet mûris-i ufûnet olmaktan nâşî gerek bu ufûnetten ve gerek getirdikleri cenâzelerin taaffününden mahall-i mezbûrda hastalık tekevvün etmektedir. Hân-ı mezbûrda olan murdarlıkların ref‘i ve andan mütevellid olan mazarratın def‘i orada ikâmet etmekte olan İran Şeh-bender vekili marifetiyle hân-ı mezbûr derûnuna bir kaç aded memşâ binâ ve inşâ olunarak hem bunların mesârıf-ı inşâiyyesi ve hem de câ-be-câ tathîrleriyle derûn-ı hânda terâküm edecek gübre ve süpüründü ve fezalâtın külli yevmin kaldırılup hârice çıkarılması lâzımesiyçün hân-ı mezbûra konmakta olan Acem züvvârının beherinden birer Acem pulu ya‘nî ikişer buçuk, üç para kadar bir resim tahsis olunsa hânda tekevvün edecek ufûnetin mümkün mertebe indifâ‘ı hâsıl olabilir ise de kimse tarafından bakılmamış ve ihtâr eden olmuşiken muvâfakat olunmamıştır.

İstıtrâd Der Bahs-i Sûzmâniyân

İran memâlikinde Sûzmânî demekle ma‘rûf bir tâ’ife vardır ki nisâlarının
raks ve zinâdan gayrı san‘at ve bu hâl-i fuhşiyet-me’âlden ma‘adâ pişe ve hırfetleri
yoktur. Bâlâda zikr olunan Hânikîn ve Hacı Kara karyeleri el-hâletü hâzihî
tasarruf-ı İraniyân olan Zuhâb sancağına kurb ve civâr bulunduklarından tâ’ife-i
mezburenin bir-kaç hânesi oraya kadar gelip tavattün etmiş ve ahvâl ve âdetleri
tahkik olunmuş olduğundan ta'rîfine mübâderet olunur şöyle ki, tâ’ife-i mezbûre
[139] bir nev‘ çengi demek olup asıl san’atları raks etmek ve zinâdan kat‘an
arlanmayup karısına göre yirmi paradan iki yüz guruşa kadar gönüllerini edenlerle
istifrâşı kabûl eylemekdir. Bir müşteri birini oynatacak olsa istediği sûzmânî için
haber gönderdiği anda bir sürü karı zevc ve peder ve birâderleriyle berâber gelip
karılar ikişer ikişer oynayup bâkîleri çalgu çalarlar. Erkeklerinde çalgu çalmak