Image du Monde en vers

Devers islande seur la mer A oisials, que on voit voler Quen arbres croissent par les bes Et quant de meurer sont pres Cil qua terre chiet ne puet vivre Et cil de laigue, sont delivre EN islande a un isle grant Sans male beste, et sans serpent Qui en la terre, daillors porte La vermine i est tantost morte Une en ja bien loins em mer Ou nus hom ne puet demorer Mais li oisel qui sont fumele Se traient tout ensus de cele Sira une autre ou nules gens Ne puet morir en nesun tans Mais quant il sont vieil et crauslant Et de lor membres si dolant Quil ne se pueent soustenir Et quil ont plus chier amorir Que vivre si se font porter En une autre por devier Outre en a une qua non thylle Li arbre qui sont en cele isle Tienent lor fueilles en verdors Iver, et este, et tous jors Cele part na cun jor en lan Dont la nuis dure demi an .vi. mois entiers ades obscure Lons est li jors qui .vi. mois dure

[initial: 7th row, opening initial /E/, 2 lines, in blue with red pen flourishing]

EN islande est uns autres lieus Qui nuit et jor, art com uns feus Con apele la purgatoire Si perilleus est il en core Que sil ivont aucunes gens Qui nesoient bien repentans Tantost est ravis et perdus Com ne set quil est devenus Sil est confes, et repentans Si vait et passe mains tormens Et sespurge, de ses pechies Quant plus en a, plus li est gries Nule riens, jamais ne li plaist Tant com en ce purgatoire est En cest monde, jamais nul jor Ne rira, mais ades en plor En gemissant se plainderont Por les pechies, que fais aront En cele isle a, un mont molt grant De soufre nuit et jor ardant Embretaigne, ra ce dist on Une fontaine, et un perron Quant on gete laigue desus Si pluet et vente et rechiet jus Iluec a gent, dune maniere Qui keues ont, par deriere Si ra on en france veu Une gent qui furent cornu Unes femmes, ra vers les mons Qui boches ont soz les mentons

[initial: 1st row, opening initial /E/, 2 lines, in red with blue pen flourishing]