Image du Monde en vers

Qui tant a toutes gens greva Que la lune en fu entoschie Et sa clartes amenuisie Des .vij. estoiles qui isont Dou firmament ou lor cors font Dont nous avons parle avant Ne connut on premierement Fors les .ij. qui apperent miex Ce est la lune et li soliex Les autres ne connoist on mie Se ce nest, par astronomie Et nequedent ses nommerons Por ce que parle en avons De celes a .ij. sor la lune Lune sor lautre dont chascune A en terre, proppres vertus Cest mercures, et puis, venus, Desor ces .iij. est li solaus Qui tant est clers, et purs et bials Que clarte rent par tot le mont Et est si haut assis amont Que ses cercles, est .xij. tans Que cil de la lune plus grans Qui son cours en .xxx. jors fait Mais li solaus, qui plus loins vait De la terre, met a son cours . Ccc. et .lxvi. jours .Xij. tans plus et un peu outre Si com li kalendriers, Nous moustre,

Puis volrent, dou solail enquerre Combien il est loing de la terre Et combien ses cors, ert de grant Si le troverent molt plus grant Que toute la terre dasses Quant ces .iij. eurent mesures Li solail, la lune et la terre Si peurent de legier enquerre Des autres estoiles apres Combien chascune, ert long ou pres Et la grandesce, de chascune Dont il ni troverent nes une Que ses cors nait plus de grandor Que la terre, dou tout entor Fors .iij. des planetes sans plus Ce est mercures, et venus Et la tierce, ce est la lune Ce sont i ces .iij. dont chascune Est plus petite, que la terre Dont cascuns puet, por voir enquerre Sil set lart, de geometrie Et avec ce, dastronomie Ce li convient primes savoir Ains quil puisse, enquerre le voir Mais por ce, que tout ne sont mie Bon clerc, maistre dastronomie Que il le puissent esprover Volvons nous apres raconter Combien la terre est longue en li Et com ele a despes enmi parmi