Image du Monde en vers

En miedi pert ele son non Ceste ynde est close tout entor De la grant mer qui fait sontor En ynde siet probanne une isle De .x. cites et mainte vile Qui chascun an a .ij. estes Et .ij. yvers si atempres Quil i a verdure tous jors Herbes, et flors, fueilles, verdors Dor et dargent, plenteureuse Et dautres biens, molt eureuse La sont les grans montaignes dor De pierres et dautre tresor Mais ni ose aprochier hons Por les dragons, et les gripons Unes bestes i sont sauvages Qui ont cors de lions volages Et emportent bien tout arme Un homme quant lont atrape Sia maint lieu tant delitable Qui samblent [si] esperitable Que suns hons sestoit dedensmis Il diroit que cest paradis EN ynde siet uns molt grans mons Qui est une grans regions Con apele mons caspieus Iluec sont unes gens sens biens Qualixandres dedens enclost Et sont la gent, got, et margot Qui char domme menjuent crue

[initial: 22nd row, opening initial /E/, 2 lines, in red with blue pen flourishing]

Et sa vertu, selonc nature Par quoi les diversetes sont Des choses qui en terre sont Et les remuances de tans Li uns tart, li autre par tans Les fruis quen terre, fait venir Lun an, et lautre, sans fallir Et en un an, sont plus tost meur Quen un autre, et plus asseur De tempes, et dautres grevances Si font asses, dautres muances Uns estes est, moistes et dous Et li autres ses, et ventous Des yvers ravient il sovent Quil se changent, en lor convent Que luns, et est frois, et pluvieus Plus que lautres, et anieus Et uns autres, mains sans peril Lun voit on chier et lautre vil Aucune fois, et puis voit len De ce dont plus vient en cel en Quen un autre en est grant chierte Et ce quen un an, est plante Revient miels, devant ou apres Que en cel an devant ou pres Toutes ces diversetes font Les estoiles, qui ou ciel sont Mais cest par la volente dieu Que chascune, a mis en son lieu Ou son cours fait, naturelment