Image du Monde en vers

Quant il la parfait et furni Si muet ses heles et les bat Vers le solail, tant quil sembast Ou cors une si grant chalour Quil esprent et art tout entor Tant que tous ars, et brusles est Et lues dont uns autres renest Puis vient damas, et anthyoche Ou il a, maint chastel sor roche Palatine, et puis samarye Sebaste, et puis panthapolie Sodome, et gomorre i furent .V. cites, qui perillier durent En cele part est la mers morte Qui en li riens, vive ne porte Ysmaelite, une contree I est, et si est habitee De .xij. manieres de gens Puis si vient, egypte la grans Ou ivers, ne plueve ne virent Qui .xxiiij. peuples tient Si ra une autre region Qui vient devers septemtrion Ou il ne repaire nus hom Fors femmes fieres com lion Qui vers les hommes se combatent En camp, et tuent et abatent Armees comme chevalier Et ont les tresces par derier Et sont tous preus a tous essones

[initial: 8th row, opening initial /P/, 4 lines, in red with blue pen flourishing]

Chascune nuit diversement Car sautre riens, navoit son us Estans, fors le solail sans plus Comme cil qui vait iugalment Chascun an par le firmament Et un este autretant monte Com il fait lautre par ce conte Et tous ivers, autant descent Et chascun jor, vait igalment Tant quil revient trestout apoint Lautre an apres en son droit point Ou devant fu, ce sevent bien Cil qui sont astronomien Quil vait ou ciel trestout entor Et la ou il est hui cest jor Resera il dui en un an La meismes, parce set an Que sautre estoile ni avoit Ses pooirs autrement iroit Tout li an seroient samblant Chascuns, tels com il fu devant Et li mors, se resambleroient Chascun an, si com il venroient Uns genviers, a autre genvier Uns fevriers, a autre fevrier Et des autres .x. mois ausi Car li solaus vait tout ainsi En un mois, com il fait apres Quant en tel mois est ensi pres Et li jors si resambleroit