Image du Monde en vers

Qui porprendent dusquas mameles Et sont la tenues por bestes Autres gens ont es dos grans boches Autre si tort quil vont acroces Et cil qui voient ces afaires Sovent, ne sen merveillent gaires Muials, et sors, voit on bien estre Et gens qui domme et femme ont teste Sans bras a on veu souvent Et sans mains naistre aucune gent De la maniere de nos bestes LI goupils por les oisials prendre Sen vait as chans com mors estendre Li cers menjue, aucun serpent Por renoveler, son jouvent Se bous niraigne lomme mort Li hom en a souvent la mort La salive domme geun Tue liraigne, et bot commun Li leus emporte sans mal faire La brebis, que nen a contraire Souef la gete, sor son dos Puis la deveure en son repos Liraigne trait, de ses entrailles Les files, dont eles font toiles Por prendre mousques ason oes Que nus hom ne les feroit miex Quant la singesse a .ij. faons Si aimme lun, et lautre non Lame emporte, entre ses bras

[initial: 12th row, opening initial /L/, 4 lines, in blue with red pen flourishing]

O dautres choses quon imet Qui est si chaus quant pres est Que daigue estaindre nel puet on Fors daisil, dorine, et de sablon Cele aigue vendent sarrazin Plus chiere quil ne font bon vin Autres fontainnes daillors isent Qui plaies, et mals, diels garissent Autres sont qui rendent memoire Autre oubliance et font encore Autres qui luxure refraignent Autres resont qui les rengraignent Autres sont qui les femes font Enfant porter quant nul nen ont Autres qui font brahaignes estre Et de porter lor talent naistre Flun sont qui font noires brebis Et noires blanches par devis Si sont estanc, por nule riens Ni puet durer, ne hom ne chiens Nautre beste, ne nus poissons Que tantost ne sen voist aufons Ou nus hom assommer ne puer Mais par dehors, floter lestuet Autres fontainnes chaudes sont Qui les larrons a vugler font Qui se parjurent dou mesfait De larrecin quant il lont fait Et son li met sus por noient Semboit, et voit miex que devant