Image du Monde en vers

Et est com uns rasoirs trenchans Et quanquele ataint devourans Si desront et trenche parmi Et par verite le vous di Sele est prise par nul engieng Si se laist morir de desdaing Mais ele ne puet estre prise Fors par virge, bele adevise Bien paree por li decoivre Et cele sen geron li oevre Lors sen vient la beste tantost Vers la pucele si sen dort En son geron molt simplement Et lors la prent on en dormant UNes grans bestes ra en ynde Trop fieres qui ont coulor ynde Et cleres taches par lor cors Qui sont si males et si fors Tygres ensi les apele on Et queurent de si grant randon Que quant li veneor i vont Por prendre autres bestes qui sont Jamais diluec neschaperoient Se par la voie ne getoient Miroirs de voirre, et conjoient Lor ymages que iluec vo[r]ent Cuident ce soient lor faon Si vont entor et en viron Et tant les defrotent as pies Que quasses les ont et brisies

[initial: 15th row, opening initial /U/, 2 lines, in blue with red pen flourishing]