Image du Monde en vers

Plus por cerchier que por conquerre Sen ala il en mainte terre Quant a cials combatre se dut Qui les oliphans orent duit Et apris de combatre aplain Si fist faire vaissiaus darain Si com hommes toz plains de feus Que il menoient devant eus Por combatre en contre ces gens Qui estoient sor olyphans Et quant li olyphant getoient Lor poiaus, dont la gent tuoient Si ardoient lor musiaus tuit Tant quil les en orent si duit Quaprochier nosoient les hommes Por la samblance de lor formes Ains tenoient lor boiaus haut Car il cuidoient quasi chaut Fussent tout li autre com cil Ainsi eschieva cel peril Alixandres qui si fu sages Et conquist celes gens sauvages Et douta si les olyphans Que mal nosoient faire as gens Olyphant vont molt simplement Ensamble et molt acordaument Quant sentrecontrent les chies baissent Ensi com sil se salvassent De molt froide nature sont Car li dent qui divoire sont

Si gemissent et font dolour Et li petit qui vont entor Mucent par desous sel soulievent Aucune fois est quil le lievent Eust sont eschape de mort Aucune fois par lor effort Mais quant nel pueent relever Si lor convient laissier ester Et sen vont gemissant ades Et cil qui sont repus empres Les prennent par lor estrumans Ensi prent on les olyphans Ou flun dynde qui a non gauges Vont les anguiles a grans renges Qui bien on .ccc. pies de lonc Et que on menjue a besoing Mainte autre beste merveilleuse A en ynde horrible et hideuse De grans sarpens et dautres bestes Qui cheviax ont et cals en testes Iluec li basilicque sont Qui si venimeus regart ont Qui dou regart daus seulement Ocient les oisiaus et gent Teste de coc, cors de serpent Nule beste, a lui ne se prent Rois est de sor tous les serpens Et sor bestes li cos poissans Il est, blans, baies, ca, et la La terre par la ou il va

Navra jamais herbe ne fruit Nes li arbre emperissent tuit Se morte a beste ou autre chose Jamais beste aprochier ni ose Sira en cele region Serpens acorne de mouton Une autre i a qua non aspis Qui ne puet estre nul jor pris Nen chantes se par dous chant non Dont il oit volentiers le son Mais quant le chant primes escoute Sa keue en ses orailles boute Que ne loie, et se trait ensus Por ce quil ne soit deceus Autres i a quont non tygris Que on prent a force tous vis Cest cil dont le triacle on fait Qui tout venim oste et desfait UNe maniere i ra de vers A .ij. bras felons et divers Que les olyphans en abatent Et tuent quant pres diaus sembatent Cil serpens vit molt longement Car quant viel et foible se sent Si se confont par geuner Et se laisse si afamer Que peu li remaint de son cors Puis se met par .i. pertruis hors Daucune piere molt estroit, Et se met outre A tel destroit, Que la pials i remaint entiere

[initial: 5th row, opening initial /S/, 2 lines, in red with blue pen flourishing] [initial: 15th row, opening initial /A/, 2 lines, in blue with red pen flourishing] [initial: 19th row, opening initial /U/, 2 lines, in red with blue pen flourishing]

[lower margin, quire number: .vj.^us]