Image du Monde en vers

Mars le mardi, par tel mesure Est li mecredis, tant quil dure De jupiter, est li guesdis Et de venus, li venredis Samedis est dis de saturne Li sains diemainches sahurte Au solail qui est li plus biax Por ce vaut diemainches miax Que nus des jors de la semainne Car cil jors est mis hors de painne Et celui jor doit ou mains faire Chose qui adieu soit contraire Mais puis keu cest secont escrit Avons le firmament descrit Si dirons apres daucun cas Qui amainnent, et haut et bas Autant vielt dire, diemenche Com jor de pais et de loenge Car toute riens doit ice jor Loer le sovrain creator Dou tour dou firmament et des estoiles li .xix. capitles. Por saturne la daesrainne Qui des .vij. est la plus hautainne Est li ciels que on voit si plain Destoiles, quant il fait serain Com cil qui tous en est voltes Cil ciels, qui si est esteles Est li firmamens qui tornoie De cui tor ist issi grant joie

[initial: 23rd row, opening initial /P/, 4 lines, in red with blue pen flourishing]