Page 440

ou mere muert, le fiz ou la fille est saisi de s'escheete par son dreit qui l'en saisist.

XVIII. Et si est usage ou assise que pere ou mere a le baillage dou fié qui est dou dreit de son fiz ou de sa fille, qui est merme d'aage, devant toz autres parens, jusqu'à ce que l'eir ait son parfait d'age, c'est assaveir, le fiz quinse anz, et la fille mariée. Et se le pere ou la mere requist le baillage de l'enfant, et l'enfant ne fust present en la court au jor et à l'horre que l'on requist le baillage por lui, le seignor ne la court ne l'aureient pas à oyr, por ce qu'il ne sereient pas certains par tel maniere de dit que enfant y eust: car encores amenast l'on l'enfant à court de par qui l'on requeyst le baillage por lui, celui ou celle qui le baillage requereit, devreit offrir à prover, si come court esgardereit ou conoistreit que prover le deust, que celui ou celle de qui l'on direit que l'escheete sereit venue à cel enfant, l'eust tenu à son fiz ou à sa fille ou à son parent, et prover le, c'il fust qui le contredeyst ou mescreust. Car ce ensi n'esteit, l'on poreit requerre et aveir por enfant sanz ce que l'on l'eust onques eu; et se l'on l'aveit eu et il fust mort, si le poreit on por le mort requerre et aveir, et par ce sereient les freres ou les surrs ou les autres parenz, à qui aucunes des dittes choses seroient escheues, deserités de leur dreit, et sereit tort apert et contre raison.

XIX. Et si est assise ou usage que se aucun a dreit en aucune chose qui escheue li seit et dont il seit le plus dreit heir, ce il ne vient en cest reiaume et ne requiert s'escheete, si come il deit et là où il deit, que l'on n'est pas tenu de respondre à autre qui la requiert por lui; et que ce un des autres heirs de celle part dont l'escheete muet, vient en la presence de la court où l'on celle escheete deit requerre, et la requiert si come le plus dreit heir aparant qui en la court seit, et l'euffre à prover, c'il est nul qui l'en mescreit, il en aura la saisine et en usera come de son dreit, tant que autre seit venu en cort qui ait prové, si come il deit, qu'il en seit plus dreit que celui qui l'a et tient.

XX. Et si est usage ou assise que qui tient fié d'autre en cest reiaume, que il li deit en chief l'omage, sauf la ligece dou chief seignor, ce il ne peut mostrer que il à autre deit l'omage en chief, ou c'il ne peut mostrer, si come il deit, que il en seit quitte.

XXI. Et si est usage ou assise que qui se claime d'autre en court, celui de qui l'on se claime, à la premiere clamor deit aveir jor de quinsaine, c'il le requiert si come il deit, se assise ne li tolt .

XXII. Et les assises qui tolent le jor sont cestes: