Page 441

L'assise de la clamor dou murtre,
Et celle de trayson,
Et celle de force aparant,
Et celle d'esforsier feme,
Et l'assise dou rei Baudoyn de cop aparant,
Et l'assise de plegerie,
Et quant le seignor se claime de defaut de servise,
Et quant le sodeier se claime de ces sodées,
Et l'assise des bestes restives,
Et de la force aparant dit on qu'elle ne peut estre aparant, se celui de qui l'on se claime ne la conut et otreie, ou ce il ne la fait en la court, ou se elle n'est provée sur lui par garenz, et il en peut bien lever et torner l'un des garenz: car qui est ataint de force, son cors est en la merci dou seignor.

XXIII. Et qui viaut lever garent, si tost come il le veit agenoillier por jurer la garentie que il a dite en parole, il le deit saisir par le poin destre et dire: "Lieve tei sus, car je te lieve come faus parjure; que en tei ne remaint que tu ne t'esparjure; et ce sui ge prest que je le te mostre et preuve de mon cors contre le tien, tot ensi come la court esgardera et quant." Et adonc se deit agenoillier devant le seignor et tendre son gage, et l'autre s'en deit defendre. Et adonc deit le seignor receveir les gages et comander à la court qu'il esgardent la maniere de la bataille et le jor. Et se aucun des deus est mahaignié de mahaing aparant, ou ila passé aage de soissante anz, il peut metre en leuc de lui cham­ pion; et ne covient pas que il le nome, mais die que ce mostrera il par un home encontre l'autre, par ce que il est mahaignié ou par ce que il a passé aage.

XXIV. Et ce celui qui lieve le garent est sergent, et le garent est chevalier, l'apeleor se deit faire chevalier et se deit combatre à lui come chevalier. Et se le chevalier qui est garent viaut dire que il ne se viaut prendre au sergent, por ce que il n'est pas son per, le sergent peut respondre que ce ne peut riens aidier au chevalier en tel cas: car ensi sereient moult maubaillis toz ciaus qui ne sont chevaliers, se les chevaliers peussent garentir quanque il vodreient sur eaus et l'on ne les peust torner, et donc sereit l'assise faillie, qui dit que de totes carelles ou damages ou perills de la value d'un marc d'argent en amont, si a torne de bataille encontre le garent: et en l'assise n'est sauvé ne chevalier ne autre.

XXV. Et de totes carelles de murtre ou d'autres choses de quei chevalier apelle sergent, ou sergent chevalier, l'apeleor se deit combatre à celui à cui il a apelé, à la lei de bataille de celui qui est apelé. Et bien se gart celui qui s'avoe por mahaignié ou por aveir passé aage, que ilseit garni de champion au jor que l'on li doura: car c'il ne l'eust, il sereit ataint; et se il meismes se vosist combatre, ne le poreit il faire, se il n'eust moult maistreé au doner des gages.