74v

[column 1]
Ne [creances?] ne loiauteiz
Se avoec ce nest chariteiz
[image]
la nature dou coulon
En trestous les autres oiseaus
Est li coulons cortois et biaus
et en bone senefiance
Sains esperis en sa samblance
Descendi en bautisement
De ihesucrist tout vraiement
et maintes foiz est avenu
Que en sa samblance est venu
sains esperis por conforter
Ceus cui on voloit tormenter
Por faire icelui dieu guerpir
Qui tout puet sauver et garir
Jadis chascun an soloit lan
En la citei de ihursalam
La veille de pasques veoir
I. coulon blanc venir por voir
Qui aportoit le feu novel
En coulon a mult dous oisel
et sans fiel et sans amertume
Si ont une bele coustume
Qant il sont en une champengne
Que en baisant sentracompengne
[parchment repair] Qant il sont en .I. coulonner
Diu cent . ou troi . ou i. millier
I. en i a qui mult est prous

[column 2]
Qant il ses muet ses muevent tous
Cil les maine de toutes parz
Par montengnes et par essarz
Ens en plains chanz et ens arez
En gaengniez et en semeiz
et qant il trueve le sauvage
Il est tant voisier et si sage
Quil le trait a son coulomier
Si lor fait les boiax lessier
Icist oiseaus nous senefie
Ihesu qui tout a en baillie
Qui tout governe et qui tout fait
et qui de toutes parz atrait
les coulons en son coulomier
et le champestre et le ramier
Ses coulomers est sainte eglise
ou il atrait a son servise
Par bone predication
Nous qui sauvage estion
Des sarrazins et des payens
a fait sovent bons crestiens
et fera vers le finement
Toute la gent comunement
Saillir ens en la foi commune
Dont venront les .ii. loiz a une
Diex est esperiter coulons
bons est et beaus et leiz et lons
et ses eles si longes sont
Qeles acuevrent tout le mont
la voie que il nous ensegne
Devons aler nus ne senfaigne
Se ce faisons seurement
Tous nous metra a sauvement
Vous ne devez esperer mie

Column 1, above rubric: Image depicts on left the lead dove welcoming other doves into the dovecot; on right the allegorical meaning is shown with Jesus gathering mankind into his house, the church.
Marginalia at top of Column 2: "la nature du coulon"