78r

[column 1]
Ca sus amont vers orient
a i. haut mont qui lons sestent
Ou len trueve une pierre dure
Qant on la quiert par aventure
Mais ele ne luist pas par jour
Car adonc pert sa resplendour
li solaus clers par veritei
li reboute sa grant clartei
Cest dyamans dont je vous cont
Si dure pierre na en mont
Nule autre chose ne la fraint
Ne fers ne feus ne la destraint
Mais cil qui depecier la voelent
a maus defer percier lesuelent
Qant en sanc de bouc est trempree
en tel guise est engrumelee
Mais il covient que li sans soit
Tous fres et ne soit mie frois
Tant vous aprent delaimant
Que la pierre nest mie grant
a feu resamble sa coulours
et a cristal sa resplendours
aucun dient de layment
Quil est contre venim poissant
et quil chace vaines poours
Ne nule ars des anchanteors
Ne porroit celui enchanter
Qui ceste pierre sieut porter
Daymant qui a tel vertu
Senefie le roi ihesu
Si com li profetes recorde
Qui a ceste letre sacorde
Je vi seur .i. mont daymant
Fait la profete .i. homme estant

[column 2]
en mi le pueple disrahel
Cil hom estoit cortois et bel
li mons ou la pierre est trovee
Qui tant est dure et esprovee
Senefie dieu nostre pere
la pierre qui mult par est clere
Doit senefier ihesucrist
Qui por nous humanitei prist
En tenebres nous visita
De clartei nous enlumina
En la sainte letre lisons
Celi qevangile apelons
Que li sauveres dist de soi
Je sui ou pere et il en mot
et qui me vient il vient mon pere
Qui nasqui de la virge mere
Ihesucris nostre sauveor
Nous visita en tenebrour
Mult pardut on estre joiant
Qant il trova tel aymant
et de tenebres la fors trait
Cest li sauveres qui sestait
Seur les pierres fermes et dures
Qui por cops ne por hurteures
Ne li faillent ne ne faudront
Mais tousjors fermes se tendront
En cestes pierres entendeiz
les apostres bons eureiz
les profetes et les bons sains
Conques ne furent faus ne fains
Onques por torment ne flechirent
Mais por dieu martyre soufruent
et tel travail et si grant paine
Que or en ont joie certaine

Note: Top left of folio page (above start of column a) there are some indecipherable rubricated words that are cut off.

Top right corner: roman numeral foliation "lxxviii" and modern foliation in red "78"