22v

Qui plus vaut a astronomie
Que nule qui ci soit nommee
Par li est ele mesuree
Car ele compasse et mesure
Toute riens ou il a mesure
Par li puet on savoir le cours
Des estoiles qui vont tous jors
Et la grandor dou firmament
Solail, lune, terre, ensement
Par li set on la verite
De toute riens la quantite
Ja si lontaigne ne sera
Mais que on voie dusque la
Qui bien entent geometrie
Voit mesure en toute maistrie
Par mesure fu fais li mondes
Et hautes choses et parfondes
La sizisme ars musique
LA sisisme ars siest musique
Qui se forme darimethique
De cesti muet toute atemprance
De cesti fusique sa vance
Car ausi com musique acorde
Tout ce qui en li se descorde
Et a concordance, ramainne
Tout ensi fusique se painne
De ramener nature en main
Qui se destempre en cors humain
Quant aucuns malages lencontre
Mais ele nest mie dou nombre

[initial: 19th row, opening initial /L/, 4 lines, in blue with red pen flourishing]