87v

Es gens qui diversetes ont
Soit de corage, ou de faiture
Et quanquil avient, par nature
En herbes, en plantes, en bestes
Avient par les vertus celestes
Que diex as estoiles donna
Quant le monde primes forma
Et par nature, ensi les mist
Quen tor le mont aler les fist
Contre le tor dou firmament
Par lor tor, par lor movement
Par la vertu, qui ou ciel gist
Est toute riens, qui sous ciel vist
Sa dieu venist ore aplaisir
Que le ciel fesist coi tenir
Quil ne tornast ala reonde
Il na nule riens, en cest monde
Vivant, qui movoir se peust
Ne qui en li, nul sens eust
Ne plus coms mors, qui riens ne sent
En qui na sens, ne movement
Com cil qui de vie na point
Tout seriemes en autel point
Com chascune chose seroit
A leure qui li ciels lairoit
Son movoir, que ensi seroient
Que jamais, ne se moveroient
Tant que ciels, avroit movement
Et lors reseroit autrement
Mais qui lors de ces ciels porroit