88v

Plus ont plainne, cervele es testes
Nes la mers meisme sen enfle
Et en son decors, se desenfle
Tant que revient ou mois apres
Dont cil qui de la mer sont pres
Quant la lune, doit estre plainne
Chascuns dials, sa maisnie en mainne
Et ses longent, de lor manoir
Ou il vont en haus lieus manoir
Tant que la mers, sen vait arriere
Chascum mois font entel maniere
Et ce lor avient, par la lune
Qui des .vij. planetes est une
Si voit on dou solail ausi
Que quant il aproche de ci
Si fait la terre, fruit porter
Ensi seit, li solaus ovrer
Qui fait aparoir, fuelle, et flor
Et revenir toute verdour
Tout oisel commencent lor chans
Por la douchor dou novel tans
Et quant il prent a rabaissier
Si nous fait iver commencier
Et fait et fuelle, et flor faillir
Tant quil se prent, a revenir
Puis que ces .ij. estoiles ont
Tels vertus, et tels choses font
Les autres quou ciel sont portraites
Ne sont mie, por noient faites
Ains a cascune, sa droiture