10v

[Column A]

Q[ue] il meissent lors saisons
En aprendre tele clergie
Quil ne p[er]dissent segnorie
Ap[re]s ceste vie volage
Car p[ar] nat[ur]e [et] p[ar] lignage
Doivent il tuit am[er] clergie
[et] aprendre toute lor vie
Car Charlemaines m[o]lt lama
Philosophes [et] avanca
En France de tout som povoir
Touz les bons clers quil pot avoir
Mandoit [et] retenoit o lui
Maintes paines [et] main anui
En ot p[or] clergie avancier
Nonq[ue]s p[or] ce nel vout laissier
Quil ne tenist clergie p[re]sez
Ainz ap[ri]st volentiers ades
[et] sot assez dautronomie
Si co[m]me raconte sa vie
Q[ui] est amez en Loherraine
Ou il fu p[ar] mainte semaine
Car m[o]lt ama le leu [et] lestre
Si vouloit souventes fois estre
Encore ail de ses jouiax
En liglise riches [et] biax
Quil li douna co[m]me preudom
Car m[o]lt ama Dex [et] so[n] no[m]
E se pena toute sa vie
Damener en France clergie
Oncore i est oncore i regne
P[ar] latret dou roi K[ar]l[e]maine

[Column B]

Sen est au roi m[o]lt bie[n] cheu
Q[ue] ainsint len est avenu
Car a touzjors ont conqueste
Sens pris clergie a la cite
Sil labeent a maintenir
[et] la vile em pes retenir
Car se clergie sen aloit
Chevalerie le sieurroit
Ausint come ele a fait ades
Car touzjors se tient de lui p[re]s
Si la retiegne p[or] som preu
Car tost pouroit perdre son leu
Se clergie sen dep[ar]toit
Car Dex len desavanceroit
Qui ore len a avancie
[et] sor autres citez haucie
Si sont encore une autre genz
Qui venu sont en n[ost]re temps
Jacobin [et] frere menor
Qui se sont mis p[or] Dex amor
En religion p[or] entendre
A Dex servir [et] a aprendre
Dont Dex nos a fait g[ra]nt anor
Car il retienent ore la flor
De clergie p[or] adrecier
Crestiente [et] essaucier
P[ar] lor travail [et] lor estude
Dont il nont pas pensee vide
De Dex servir toute lor vie
[et] daprendre sens de clergie
Com cil q[ui] le monde ont guerpi