32r

[Column A]

Puis torble & puis chere si fine
Q[ue]cest deliz de les garder
Mais poi en ose len user
Une eue la q[ue] en la semaine
Sort .iii. fois ou .iiii. m[ou]lt saine
& aus autres jorz se tient coie
Toute seche co[m]me une voie
Uns fluvs en ist q[ue] .vi. jorz cort
& au samedi riens ne sort
Celui flueve apelon Sabat
Car lors en t[er]re se renbat
Ou trover dAcre a un sablon
Dont len fet voirre cler & bon
& daucune glaire de mer
Q[ue] len i melle p[our] fermer
La Rouge Mer quest en Egypte
Ou li fil Isrl tuit cuite
Passerent outre a seche t[er]re
P[or] venir a la Sainte T[er]re
Prent de la t[er]re sa coulor
Q[ui] est rouge au fonz & entor
Em P[er]s est uns fluz lonz & lez
Q[ui] de nuiz est engelez
Q[ue] bien i puet aler la gent
& de jorz est clers & courant
Une fontaine a en lEmpire
De m[ou]lt m[er]veuilleuse matire
Q[ue] en i estaint brandons ardanz
& puis les resprent le[s] dedenz
En Ethiope une autre en a
Q[ui] p[ar] nuit si g[ra]nt chalor a

[Column B]

Quen ne[st] puet boire & est delorz
Froide q[ue] len si giele touz
En Lohoraine p[re]s de Mes
La cite sort une eue ades
Q[ui] len cuet em pailles g[ra]nz
Si de vient sel m[ou]lt biauz & blanz
I cele eue q[ue] ge devis
Fornist de sel tout le pais
& sort en un pui p[re]s de qui
& lapele on Le Pui Deni
Si la fontaines cele p[ar]t
Q[ui] sont si chaudes quen si art
& en meismes cele place
Sort autres froides co[m]me glace
Ilueques sont baig atempee
De chaude eue o froide melle
Cil qui si baignent en ces bainz
Li cuirz lor devient biauz & sainz
Si ira unes noires fontaines
Q[ue] maintez genz tienent a saines
Q[u] il vont boivre p[our] poisons
& font souvent purgations
P[lu]s g[ra]nt q[ue] une fort medicine
Q[ue] len les recoit p[our] mecine
Une en ia v[er]s orient
Dont leu fet feu Grizois ardant
O autres choses quen i met
Q[ui] est si chauz q[ua]nt espris est
Q[ue] deau estaindre non puet on
Fors daisil dourine de sablon
Cele eue vendent Sarazin