51r

[Column A]

Mes il ne quierent fors le loz
Dou siecle se painent t[ri]chier
Quil comperront encor m[ou]lt chier
Miaus lor vendroit tel chose apre[n]dre
Q[ui] droit bie[n] lor feist entendre
Si co[m]me cil qui sage estoient
Q[ui] si pou le monde p[ri]soient
Q[ui] soient toute lor vie
En aprendre philosophie
Ainsint se studioient lors
Li philosophe avant lor mortz
P[our] adrecier & p[our] atraire
A us & les autres a bie[n] faire
Ainz se penoient danseigner
Les autres genz & ensaignier
Cil co[n]troverent les monnoies
Q[ue] les genz portent en cor roies (?)
P[our] lor vivre achater aillors
Car len ne doune pas toz jors
P[our] les couvoitises des genz
Q[ui] peor ont de lor despenz
Le droit corrumpent de nature
Car p[ar] raison & p[ar] droiture
Devroit chaucuns prendre so[n] vivre
Au siecle si quil peust vivre
P[our] ce fu monoie establie
P[our] soutenir chascun sa vie
Q[uan]t il erroient p[ar] chemin
Mes tant aiment lor p[ar] chemin
Lor puanz piaus & lor charoigne
Outre ce q[ui] ne lor besoigne

[Column B]

Que chascuns q[ui] puet en retient
Pl[us] q[ue] a son vivre ne couvient
Q[ue] ele pourissent ariere eus
& sen laissent maint besoigneus
Ne furent pas p[our] ce trovees
Monnoies p[our] faire soudees
For tant co[m] p[our] avoir son vivre
Tant q[ue] la mort q[ui] tout delivre
En feist ce q[ue] le Deust
Au plaisir Dex quanq[ue] ce fust
& ainsint aese pl[us] fussent
Q[ui] ne sont ore & miex eusent
Chascuns ce quil li covenist
& mainz pechiez en remainsist
Mes ne sont pas si sage gent
Com furent cil q[ui] p[ar] los senz
Retroverent astronomie
Q[ue] Tholome[us] noblia mie
Ainz si estudia touz jorz
Tant quil prova & sot le cors
Des estoilles qui ou ciel font
& lor mesure tout amont
Dont nos p[ar]lames ci devant
Si v[ous] dirons dore en avant
La grandor de la t[er]re toute
Dou ciel & dou souleu sanz doute
Des estoilles & de la lune
Q[ui] nest pas chose a toz q[ue]mune
Si co[m] rois Tholomeus meisme
Le mesura jusq[ue] en abisme
& le p[reu]ve encor p[ar] raison